Kannada poems by my Mom

'ಎನ್ನ ಮನ'

2011-05-15T10:15:00.000-07:00

ಕಡಿವಾಣವ ಹಾಕಲು ಎಲ್ಲಿ ಹೂಡಲಿ ಕನ್ನ?
ಚಂಚಲತೆಗೆ ಮನಸೋತು ಕೆಲಸವೆಲ್ಲ ಅಸ್ತವ್ಯಸ್ತವೆನಿಸಿದೆಯೆನ್ನ,
ನಾನೀಗ ಎಲ್ಲಿ ನಿಲ್ಲಿಸಲಿ ನಿನ್ನ?
ನೀ ಹೋಗಿಬಾ ಎಲ್ಲಿ ಬೇಕೆಂದರಲ್ಲಿ, ನಾ ಬರಲಾರೆ ಜೊತೆಗೂಡಿ ನಿನ್ನ,
ಹೇಗೆ ತಿದ್ದಲಿ ನಿನ್ನ, ನೀ ಬರಲಾರೆ ಜೊತೆಗೂಡಿ ಎನ್ನ.

ನಿಂತಲ್ಲಿ ನಿಲ್ಲಲಾರೆ ನೀ, ಕೂತಲ್ಲಿ ನೀನಿರಲಾರೆ, ತಿರುಗುತ್ತಿರುವೆ ನೀನುಇದೇನು ಚೆನ್ನ?
ಯಾವುದೋ ನೆನಪನ್ನು ಮೆಲುಕು ಹಾಕುತ್ತಿರುವೆ, ನಾನ್ಯಾಕೆ ಮುಂದೆ ನಿನ್ನ?
ಅಡಗಿ ಕುಳಿತಿರುವ ಮನಸ್ಸು ಯಾವುದೋ ಲೋಕಕ್ಕೆ ಕೊನ್ದೊಇಯುವುದು ಎನ್ನ,
ಬಲು ತೀಕ್ಷ್ಣತೆಯ ನೋಟವನ್ನು ಎನಗೆ ನೀನಿತ್ತು ನೋಯಿಸುವೆಯಾ ನನ್ನ?

ಸಹನೆಯದು ಬಹುದೊಡ್ಡ ಗುಣ ಅದನಿತ್ತು ಸಹಕರಿಸುವೆಯಾ ಮನವೇ ಎನ್ನ?
ಸಹಿಸುವಾ ಶಕ್ತಿಯದು ಸಹನೆ, ಕಳೆದು ಕೊಲ್ಲದಿರಿ ನೀವು ನಿಮ್ಮತನವನ್ನು,
ಬಲಿಷ್ಠ ಮನವದು ಶ್ರೇಷ್ಟ ಶಕ್ತಿಯು ಮನುಜನಿಗೆ ವರದಾನ,
ದುರ್ಬಲ ಗೊಲಿಸದಿರಿ ಸದ್ಯದಲಿ ಇದರ ಶಕ್ತಿಯನು.

ಮನದಾಳವನು ತೆರೆದು ಚೆಲ್ಲಿ, ಇದರಲಿ ದಿವ್ಯೌಶದವು ಲಭಿಸುವುದು,
ಪರಿಶುದ್ಧ್ಹ ಗೊಳಿಸುವುದು ನಿಮ್ಮ ಮನದಾಳವದು ನಿರ್ಮಲಗೊಳ್ಳುವುದು,
ಸಕಲ ಚಿಂತೆಯನು ಬಿಟ್ಟು ಇರಬಹುದು ನೀವೆಂದೆಂದು
ನಿಶ್ಚಿಂತೆಯನು ಪಾಲಿಸಿರಿ ಮನದೊಳಗೆ ಇನ್ನೆಂದು.

-- ಪುಷ್ಪತಾರ ದೇವದಾಸ್ ಉಚ್ಚಿಲ್
ಬೆಂಗಳೂರು/ಮಂಗಳೂರು.

ಯುಗಾದಿಯ ಶುಭಾಶಯಗಳು!

2011-04-04T04:28:00.000-07:00

ಹಸಿರಾಗಲಿ ನಿನ್ನ ಬಾಳು ಯುಗಾದಿಯ ಈ ಸಂಭ್ರಮದಲ್ಲಿ ನೋವೆಲ್ಲ ಬತ್ತು ಹೋಗಿ ಸಂತೋಷದ ಕಾರಂಜಿ ಹೊಮ್ಮಲಿ...!

ವಾರ್ಷಿಕೋತ್ಸವ

2011-04-04T02:53:00.000-07:00

ಬಂದಿತು, ಬಂದಿತು ವಾರ್ಷಿಕೋತ್ಸವವು,
ಯಾರೂ ಮುಟ್ಟಿ ನೋಡದ ಗೋಡೆಗೆ ಬಣ್ಣದ ಅಪ್ಪುಗೆಯು,
ಎಲ್ಲಿಲ್ಲದ ಸಂಭ್ರಮ - ಸಡಗರ ಎಲ್ಲೆಡೆಯು;

ತಳಿರು - ತೋರಣಗಳ ಸಿಂಗಾರದ ಸರಮಾಲೆಯು ಹೆಬ್ಬಾಗಿಲಿಗೆ
ಬಯಲು - ಗೋಪುರ ಒಂದೂ ಅರಿಯದು
ಬಣ್ಣದ ಕಾಗದಗಳ ಪೋಣಿಸಿ ಮಾಡಿದ
ದಾರದ ಕೈಚಳಕದ ತೋರಣಕೆ;

ಈ ಸಡಗರ - ಸಂಭ್ರಮ ಎಂದೆಂದೂ ಕುಂದದೆ ಇರಲಿ,
ಎಲ್ಲರ ಮನಸಿಗೆ ಸುಖಃ ಶಾಂತಿಯ ನೆಮ್ಮದಿ ತರಲಿ,
ಆ ಭಗವಂತನ ನೆನಪು ಅಳಿಯದೆ ಉಳಿಯಲಿ ಎಲ್ಲರ ಮನದಲಿ,
ಮಾಡುವ ಕೆಲಸಕೆ ಜಯ ಸಿಗಲಿ....

-- ಪುಷ್ಪತಾರ ದೇವದಾಸ್ ಉಚ್ಚಿಲ್
ಮಂಗಳೂರು/ಬೆಂಗಳೂರು.

ಇಂದಿನ ದಿನ

2011-03-30T09:46:00.000-07:00

ಮಂದಿಗೊಂದು ಮನೆ ಬಂದು
ಹಾದಿ ಬೀದಿ ಹಾಯಾಗಿ ತೆರೆದು ನಿಂತಿದೆ
ಗದ್ದೆ -ಹುಣಿ, ತೋಡು - ಹಳ್ಳ ಮರೆ ಮಾಚಿದೆ
ತೋಪು ತೋಟ ಎಲ್ಲ ಇಂದು ಪಾಲಾಗಿದೆ
ಮನೆಯಲ್ಲಿ ಶಾಂತಿ ನೆಮ್ಮದಿಗೆ ತೊಡಕಾಗಿದೆ
ಇದು ಇಂದಿನ ದಿನ ಎಂದು ಕೂಗಿ ಕರೆದಿದೆ
ಅದು ಅಂದಿನ ದಿನ ಕೂಡಿ ಬಾಳ್ವೆ ನಡೆದಿದೆ
ಕಾಲದ ಮಹಿಮೆ ಇದು, ಹೇಗೆ ಬದಲಾಗಿದೆ?!

-- ಪುಷ್ಪತಾರ ದೇವದಾಸ್ ಉಚ್ಚಿಲ್,
ಮಂಗಳೂರು/ಬೆಂಗಳೂರು.

ಧೈರ್ಯ

2010-06-17T02:51:00.000-07:00

ಧೈರ್ಯದಿ ಅಸಾಧ್ಯವ ಸಾಧಿಸಬಹುದು
ಭಯವನು ದೂರಕೆ ಓಡಿಸ ಬಹುದು
ನೆರವಿಲ್ಲದೆ ಕೆಲಸವ ಮಾಡಲು ಬಹುದು
ಆನೆಯ ಬಲವನು ಪಡೆಯಲು ಬಹುದು

ಧೈರ್ಯವು ಎಲ್ಲರ ನೆರವಿಗೆ ಇರುವುದು
ಓದಿನ ಉನ್ನತಿಗೇರಲು ಸಹಕರಿಸುವುದು
ಛಲವನು ಬಿಡದೆ ಧೈರ್ಯವಗೆಡದೆ
ಗುರಿಯದು ತಲುಪುವುದು.

-- ಪುಷ್ಪತಾರ ದೇವದಾಸ್ ಉಚ್ಚಿಲ್
ಮಂಗಳೂರು

ಹೂವುಗಳು

2010-06-17T02:31:00.000-07:00

ಬಣ್ಣ ಬಣ್ಣದ ಹೂವುಗಳೆಲ್ಲ,
ಅರಳಿವೆ ಗಿಡಮರಬಳ್ಳಿಗಳ ತುಂಬೆಲ್ಲ,
ಹೂವಿನ ಸೊಗಸು ಅದೆಷ್ಟು ಅಂದ ನೋಡಿದಲೆಲ್ಲ,
ಹೂವಿನಂತಹ ಮನಸ್ಸು ಅದೆಷ್ಟು ಕೋಮಲ!

ಹೂವಿನ ಮಕರಂದ ದುಂಬಿಗೆ ಆಹಾರ,
ದೇವರ ಗುಡಿಗೆ ಹೂವಿನ ಅಲಂಕಾರ,
ಹೆಣ್ಣಿನ ಮುಡಿಗೆ ಹೂವಿನ ಶೃಂಗಾರ.

ಭೂಮಾತೆಯ ಮಡಿಲಲ್ಲಿ ಹೂವಿನ ಹಂದರ,
ಇದುವೇ ಸ್ವಾರ್ಥರಹಿತ ಪ್ರಕೃತಿಯ ಶಾಶ್ವತ ಮಂದಿರ!

-- ಪುಷ್ಪತಾರ ದೇವದಾಸ್ ಉಚ್ಚಿಲ್
ಮಂಗಳೂರು.

ಮನೆ

2009-09-25T02:24:00.000-07:00

ಮನೆಯೆಂದರೆ ಅದು ಹೀಗಿರಬೇಕು:
ಚಿಕ್ಕದಾಗಿದ್ದರೂ ಅದು ಚೊಕ್ಕವಿರಬೇಕು ,
ಮಕ್ಕಳ ಸ್ವರವೂ ಬೇಕು ಹಕ್ಕಿಗಳ ಇಂಚರದಂತೆ,
ಹಿರಿಯರ ಹಿತನುಡಿಗಳ ಸಾರ ಇಲ್ಲಿರಬೇಕು,
ಮನಸ್ಸಿರಬೇಕು ಗರಿಗೆದರಿದ ನವಿಲಿನಂತೆ.
ಮನೆಯೆಂದರೆ ಅದು ಹೀಗಿರಬೇಕು:
ಸಹಕಾರ ಮನೋಭಾವನೆಯು ಇಲ್ಲಿರ ಬೇಕು
ಪ್ರೀತಿಯ ಆಕಾರ ಕೊಡಬೇಕು ಎಲ್ಲರಿಗೂ ಮಕ್ಕಳಂತೆ,
ಎಂದಿಗೂ ಮನೆಮಂದಿಯ ವ್ಯವಹಾರದಲ್ಲಿ ಪಾಲ್ಗೊಳ್ಳಬೇಕು,
ನಮ್ಮ ವಿಹಾರವಿರಬೇಕು ಕ್ಷೇತ್ರದರ್ಶನದಂತೆ,
ಮನೆಯೆಂದರೆ ಅದು ಹೀಗಿರಬೇಕು:
ಇರಬಾರದು ಇಲ್ಲಿ ಮನಸ್ಸಿಗೆ ಬೇಸರ,
ಇದುವೇ ಸುಖಃ ದುಖಃದ ಸಮ್ಮಿಲನದ ಸಾಗರ,
ಸುಖಃ ಶಾಂತಿಗೆ ಮನೆಯೇ ಆಧಾರ,
ಮನೆಯೆಂದರೆ ಅದು ಹೀಗಿರಬೇಕು:
'HOME SWEET HOME'

-- ಪುಷ್ಪತಾರ ಡಿ ಉಚಿಲ
ಮಂಗಳೂರು
(ಜನ ಮನ ಕಾರ್ಯಕ್ರಮ ದಲ್ಲಿ ಪ್ರಸಾರವಾಗಿ ಬಹುಮಾನ ಗೆದ್ದ ಕವನ )

ಮಕ್ಕಳು

2009-09-25T01:46:00.000-07:00

ಇಂದು ಇವರು ಮಕ್ಕಳು
ಮುಂದೆ ಇವರೆ ಯುವಕರು
ಬಾಳನರಿತು ಬದುಕುವ ಮಾನವೀಯರು.
ಬೀಜ ಬಿತ್ತಿ ಗಿಡವನೆಟ್ಟು
ನೀರನೆರದು ಕಾಲಕಾಲಕೆ
ಸಾಕಬೇಕು ಇವರನು ಹೆತ್ತವರು ಎಲ್ಲರೂ .
ತುಂಬಿ ಹರಿವ ನದಿಯಲಿ
ದೋಣಿ ದಡವ ಸೇರದು ಸುಳಿಯ ಸೆಳೆತಕೆ
ಇದರ ತಿರುಳನರಿತು ಸಾಗಬೇಕು
ಮಕ್ಕಳು ಮುಂದಕೆ.
ದಾರಿ ಸುಗಮ ಗೊಳಿಸಬೇಕು ಕಾಲಕಾಲಕೆ
ಹೆತ್ತವರ ರಕ್ಷಕರು ಇವರು ಮುಂದಕೆ.
ಮನೆಯ ಬೆಳಗಿಸಿ
ನಾಡಿನುನ್ನತಿಯ ಸೃಷ್ಟಿಸಿ
ಕನಸ ಹುಟ್ಟಿಸಿ
ನನಸಾಗಿಸಿ.

ಆ ಶೃಷ್ಟಿಕರ್ತ ದೇವನಾ ಸದಾ ನೆನಪಿಸಿ
ನಮ್ಮೆಲ್ಲರ ಶುಭ ಹಾರೈಕೆಯು
ಮಕ್ಕಳಿರೋ ಇದೋ ನಿಮಗಿದೋ !!!

-- ಪುಷ್ಪತಾರ ಡಿ ಉಚಿಲ
ಮಂಗಳೂರು
(ಜನ ಮನ ಕಾರ್ಯಕ್ರಮ ದಲ್ಲಿ ಪ್ರಸಾರ ವಾಗಿ ಬಹುಮಾನ ಗಳಿಸಿದ ಕವನ )

ಗಡಿಯಾರ

2009-08-05T23:09:00.001-07:00

ಗೋಡೆಯಲ್ಲಿ ಗೋಚರಿಸುವ ಗಡಿಯಾರ
ಚಲಿಸುವುದದು ಲೆಕ್ಕ ಪ್ರಕಾರ
ಯಾರೇನು ಮಾಡಿದರೂ ನಕಾರ;
ಇದಕ್ಕೆ ತರತರಹದ ಆಕಾರ
ಲೆಕ್ಕ ತಪ್ಪಿದರೆ ಕೆಲಸವೆಲ್ಲ ವಿಕಾರ.

ನಿಂತಲ್ಲಿ ಕೂತಲ್ಲಿ ಎಲ್ಲರ ಕೈಯಲ್ಲಿ ಕಾಣುವುದು ಕೈಗಡಿಯಾರ
ಆದರೂ ಎಲ್ಲರ ಮಾತಲ್ಲೂ ಕೇಳಿಬರುವುದು ಟೈಮ್ ಇಲ್ಲ ಎನ್ನುವ ಅಧಿಕಾರ;
ಇದರ ಸೂತ್ರವನ್ನು ಅನುಸರಿಸುವುದು ತುಸು ಕಷ್ಟಕರ
ಚಲನೆ ನಿಂತು ಹೋದರೆ ಇದಕ್ಕಿರುವುದಿಲ್ಲ ಮತ್ತೆ ಸಾರ.

ಅರಿತವರ್ಯಾರು ಈ ಗಡಿಯಾರದ ಗುಣಾಕಾರ?
ಕೆಲಸವ ನಿಲ್ಲಿಸಿ ಹೂಡದಿರೈ ದಿಕ್ಕಾರ
ಗಡಿಯಾರದ ತೆರದಿ ಕೆಲಸವಾ ಮಾಡಿರೈ, ಆಗಲೇ ದೇಶದ ಉದ್ಧಾರ;
ಗಡಿಯಾರದ ಚಲನೆಗೆ ಬೇಕು ಎಲ್ಲರ ಸಹಕಾರ
ಮಾಡುವುದದು ಸರ್ವರ ವ್ಯವಹಾರ
ಎಚ್ಚರಿಕೆಯ ಗಂಟೆಯದು -- ಎಲ್ಲರ ನಿದ್ರೆಗೂ ಎಚ್ಚರ !!

ಪುಷ್ಪತಾರಾ ಡಿ. ಉಚ್ಚಿಲ,
ಮಂಗಳೂರು.

ಆಸೆ

2009-08-05T22:40:00.000-07:00

ಆಸೆ

ಅತಿ ಆಸೆ ಗತಿಕೇಡು ಎಂಬುದನ್ನು ತಿಳಿದಿರು,
ಮಿತಿಯ ಗೆರೆಯನು ದಾಟಲು ಹೋಗದಿರು.
ಇತಿಹಾಸವದು ತಿಳಿಸುವುದು ಆಸೆಯಾ ಕತೆಯನ್ನು,
ಆಸೆಯದು ಕಬಳಿಸಿತು ಭೂಮಿಯಾ ಭಾಗವನ್ನು,
ಕಾಳಗದಿ ಕಂಡಿತದು ಸೋಲನ್ನು ಗೆಲುವನ್ನು.
ಕಾಣಲು ಬಯಸದಿರು ನೀ ಸಾವನ್ನು ನೋವನ್ನು,
ಸಮಾನತೆಯ ಸಾಧಿಸು ನೀ ಆಸೆಯನು ಬಿಟ್ಟು ಇನ್ನು!

ಪುಷ್ಪತಾರ ಡಿ ಉಚ್ಚಿಲ್
ಮಂಗಳೂರು

ಸಮಯ (೦೫/೦೩/೨೦೦೯)

2009-03-05T01:05:00.000-08:00

ಸೂರ್ಯನ ಬೆನ್ನ ಹತ್ತಿ ಓಡುವುದು ಸಮಯ,
ಗಡಿಯಾರದ ಸಂಖ್ಯೆಯನ್ನು ದಾಟುವುದು ಸಮಯ
ಬಿಸಿಲನ್ನು ಓಡಿಸುವುದು ಸಮಯ.

ಸಮಯವ ಹಿಡಿದಿಡಲು ಅದು ನಿಲ್ಲುವುದು ಉಂಟೇ?
ಸಮಯವ ಉಪಯೋಗಿಸು ಒಳಿತಿನ ಕೆಲಸಕ್ಕೆ ಮತ್ತೆ!
ಸಮಯದ ಬೆಲೆಯರಿತು ನಡೆಯುವುದು ಯುಕ್ತಿ
ಸಮಯವ ಕಳೆದರೆ ವ್ಯರ್ಥವಾಗುವುದು ಬುಧಿಶಕ್ತಿ

ಒಳಿತು ಕೆಡುಕುಗಳ ಯೋಚನೆಯ ಬಳಕೆಯದು,
ಸಮಯ ಕಳೆದಂತೆ ಒಳಿತು ಬೆಳಕಾಗುವುದು,
ಕೆಡುಕ ಹುಡುಕಿದಂತೆ ಬಾಳು ಕಪ್ಪಾಗುವುದು,
ಸಮಯವ ಅರಿತು ನಡೆದರೆ ದಾರಿ ತೋರುವುದು.

ಭೂಮಿಯ ಚಲನೆಯನು ನೆಲ್ಲಿಸಲಸಾಧ್ಯ,
ಮನುಷ್ಯನ ಭವಿಷ್ಯವನು ನಿರ್ಧರಿಸಲಸಾಧ್ಯ,
ಜೀವನವ ಅನುಭವಿಸು ಸಮಯವದು ಲಭ್ಯ,
ನೀ ಸೋಮಾರಿಯಾದರೆ ಸಕಲವೂ ಅಲಭ್ಯ.

ಈ ಎಲ್ಲಾ ಸಾಧ್ಯ ಅಸಾಧ್ಯಗಳ ಮಧ್ಯೆ ನೀ
ಲಭ್ಯವಿರುವ ಸಮಯದ ಇತಿಮಿತಿ ಅರಿತು
ಸಭ್ಯತನ ತೋರಿ ಎಲ್ಲವನ್ನೂ ಗೆಲ್ಲು.

-- ಪುಷ್ಪಥಾರಾ ಉಚಿಲ್

Key

2009-03-01T23:26:00.000-08:00

ಜೋಪಾನ! ಜೋಪಾನ!
ನೀ ಕಾಣೆಯಾದರೆ ನನ್ನ ಪ್ರಾಣ
ಹಾರಿ ಹೂದನ್ತಾಗುವುದು
ಜ್ಞಾನ ಅಜ್ನಾನವಾಗುವುದು
ಇರದು ನನಗೆ ಮತ್ಯಾವ ಚಿಂತೆ
ನೀ ಕೈ ತಪ್ಪಿದರೆ ನಾ ಅಭದ್ರಳಂತೆ
ಎಲ್ಲಿ ನೀ ಸಿಗುವೆಯೋ ಅಲ್ಲಿ ನಾ ರಾಣಿಯಂತೆ
ಈ ಬೀಗದ ಕೈ ಆಟ ಆಡುವವರು ಯಾರು ಗೊತ್ತೇ
ಅವರೇ ಮನುಷ್ಯರು!!!